რუსეთში შესვლის ახალი წესები იმოქმედებს – რა იცვლება საქართველოს მოქალაქეებისთვის?

საქართველოში შვეიცარიის საელჩოსთან არსებული რუსეთის ინტერესების სექციის ცნობით, რუსეთში უვიზოდ შესვლის უფლების მქონე უცხო ქვეყნის მოქალაქეები, მათ შორის საქართველოს მოქალაქეები, ერთიან იდენტიფიკაციისა და ავთენტიფიკაციის სისტემაში უნდა დარეგისტრირდნენ.

დიპლომატიური უწყების ვებსაიტზე მითითებულია, რომ საუბარია „ექსპერიმენტის მეორე ეტაპზე“, რომელიც 2026 წლის 30 ივნისამდე გაგრძელდება

„ექსპერიმენტის ფარგლებში, რუსეთში უვიზოდ შემოსული უცხო ქვეყნის მოქალაქეები ვალდებულნი იქნებიან, ჩასვლამდე სულ მცირე 72 საათით ადრე გაიარონ ციფრული რეგისტრაცია. „Госуслуги RuID“-ის აპლიკაციაში. გადაუდებელ შემთხვევებში (მაგალითად, ახლო ნათესავის ავადმყოფობის ან გარდაცვალების შემთხვევაში), განაცხადის წარდგენა დაშვებულია უფრო მოკლე ვადაში – ჩასვლამდე ოთხი საათით ადრე“, – აღნიშნულია განცხადებაში.

ამასთან, 30 ივნისიდან რუსეთის ყველა სასაზღვრო პუნქტში შეგროვდება ბიომეტრიული მონაცემები: ფოტოები და თითის ანაბეჭდები.